पत्नीसह सासूने पोलिसांत तक्रार दिल्याच्या कारणावरून जावयासह सहाजणांनी एकास मारहाण केली
Solapur News : पत्नीसह सासूने पोलिसांत तक्रार दिल्याच्या कारणावरून जावयासह सहाजणांनी एकास मारहाण केली. त्यात तो जखमी झाला. तसेच त्यांचे मोबाईल फोडून एक तोळा सोन्याची अंगठी चोरुन नेली.
सोमवारी (ता. ११) दुपारी साडेतीनच्या सुमारास पुणे नाका परिसरात ही घटना घडली. याप्रकरणी त्या सहाजणांविरुद्ध फौजदार चावडी पोलिस ठाण्यात गुन्हा दाखल केला आहे. जावई आकाश बोंद्रे, कल्लप्पा पुजारी, विष्णू बोंद्रे, सुरेश बोंद्रे यांच्यासह अन्य दोघांचा गुन्हा दाखल झालेल्या संशयितांत समावेश आहे. याप्रकरणी जखमी देविदास भाऊ राऊत (वय ४७, रा. चिंचोळी एमआयडीसी, ता. मोहोळ) यांनी फिर्याद दिली आहे.
तुमच्या मुलीने व पत्नीने आमच्याविरोधात पोलिसांत तक्रार का दिली अशी विचारणा करीत कल्लप्पा याने लोखंडी पाईपने देविदास यांच्या हातापायावर मारहाण केली. जावई आकाश याने चाकून त्यांच्या कानावर व डोक्यावर हल्ला केला. त्यात ते जखमी झाले.
विष्णू व सुरेश यांच्यासह अन्य संशयितांनी शिवीगाळ करीत हातांनी व लाथाबुक्क्यांनी मारहाण केली. मोबाईल हँडसेट फोडून दहा हजारांचे नुकसान केले. तर एक तोळा सोन्याची अंगठी चोरून नेल्याचे फिर्यादीत म्हटले आहे.
